Wilma e wómbat

1 valoración en Wilma e wómbat

1. 

   Valorado con 5 de 5

   Miguel García-Fernández (@lectureo) – 22/10/2025

   ‘Wilma e Wómbat’ é un fermoso álbum ilustrado que combina á perfección dous aspectos para min esenciais neste tipo de obras. Por unha banda, unha estética amable, rica en detalles, chea de forza e cor, e na que as atmosferas creada pola ilustradora combinan realismo e imaxinación na espacialidade construída, á par que noutros momentos se aposta por focalizar a atención do lectorado nos protagonistas e na súa relación, de forma que os fondos desaparecen para incidir en aspectos cruciais da historia. Desta forma, lógrase unha simbiose total entre a ilustración e o texto-trama. Neste sentido, o outro aspecto moi ben logrado é este último, o de construír unha historia áxil e entretida, na que se combina o humor –neste sentido os detalles son esenciais!- cunha trama máis profunda relacionada coa xestión das expectativas, as desilusións e as dificultades de adaptación, pero tamén coa construción de novas amizades, a empatía e a aceptación dos demais tal e como son e non en función do que a nós nos gustaría que fosen (cando menos a priori).
   Se a todo isto lle engadimos que os protagonistas son unha simpática bruxiña e un curioso e fermoso wómbat –con todas as peculiaridades que ten este animal, do cal descubrimos tamén moitos detalles curiosos a través deste libro–, pois ao final ‘Wilma e Wómbat’ é unha máis que recomendable lectura para todas as bruxas que precisan un gato, pero tamén para tod@s @s lector/as que precisamos dun bo libro ilustrado infantil!
   Do máis recomendable.